सम्पादकीय: “भ्रमको खेती अब चल्दैन: जनता पुराना खेल देख्दैनन्”
जेनजी आन्दोलनले देखाएको साँचो खतरा—जनताबाट होइन, सत्ता र स्वार्थमा डुबेका दलहरूको नेतृत्वबाट।
जेनजी आन्दोलनले नेपाली राजनीतिमा नयाँ चेतना जगाएको छ। लामो समयदेखि दलहरूले जनतालाई ‘संविधान, लोकतन्त्र र गणतन्त्र खतरामा छ’ भनेर डर देखाउँदै सत्तामा टिकिरहेका थिए। तर आन्दोलनले मात्र पुरानो सत्ता उल्टाएन, तर जनतालाई पुरानो राजनीतिक शैलीप्रति सजग बनाइदियो। अब जनताले पुरानो भय र भ्रममा विश्वास गर्ने अवस्था छैन।
अन्तरीम सरकार गठन भएको लगत्तै कांग्रेस, एमाले र माओवादी नेतृत्वले फेरि पुरानै नारा—संविधान, लोकतन्त्र र संघीयता खतरामा छ— भ्रम फैलाउने प्रयास सुरु गरेका छन्। तर, इतिहासले प्रमाणित गरेको छ—खतरा जनताबाट कहिल्यै आएको थिएन; खतरा सधैं सत्ता मोह, भ्रष्टाचार र स्वार्थी राजनीतिक नेतृत्वबाट उत्पन्न भएको हो।
विगत दुई दशकको अभ्यासले जनतालाई बोध गराइसकेको छ—संविधान मिच्ने, लोकतन्त्र कमजोर बनाउने र गणतन्त्रलाई प्रश्नवाचक बनाउने काम बाह्य शक्तिले होइन, यही दलहरूको नेतृत्वले गरेको हो। त्यसैले अहिले फेरि सुरु भएको भ्रमको खेती लामो समय टिक्ने छैन।
देशलाई चाहिएको नयाँ नेतृत्व, पारदर्शी शासन र इमानदार राजनीतिक अभ्यास हो। जेनजी आन्दोलनले देखाएको सन्देश यही हो—जनताको धैर्य अब समाप्त भएको छ। संविधान, लोकतन्त्र र गणतन्त्रलाई जोगाउने जिम्मेवारी जनतामाथि होइन; जनताको विश्वास जित्ने वास्तविक राजनीतिक अभ्यास गर्ने नेतृत्वमाथि छ। यदि पुराना दलहरूले अझै भ्रम फैलाउने पुरानै बाटो समाते भने, उनीहरू इतिहासकै कठोरतम फैसला भोग्न बाध्य हुनेछन्।
तपाईको प्रतिक्रिया !!!
