कञ्चनरुप, सप्तरी । सप्तरीको कञ्चनरुप नगरपालिका–१० मा बुधबार राति करिब १० बजे भएको आगलागीबाट १० परिवारका घर पूर्ण रूपमा जलेर नष्ट भएका छन् भने थप ८ घरमा आंशिक क्षति पुगेको छ। आगलागीबाट ठूलो धनमालको क्षति भएको र पीडित परिवारले समाचार तयार पार्दासम्म कुनै किसिमको सहयोग प्राप्त नगरेको बताएका छन्।
स्थानीयका अनुसार विद्युत् सर्ट भएर आगलागी भएको आशंका गरिएको छ। आगलागीबाट दिनेश पासमान, राजकुमार पासमान, गजेन पासमान, ललकु पासमान, पाञ्छु पासमान, राजिन पासमान, उमेश पासमान, महेन्द्र पासमान, दानालाल पासमान र मंगल पासमानलगायतका परिवारको घर पूर्ण रूपमा जलेर नष्ट भएको छ।
पीडितहरूका अनुसार आगलागीमा नगद, धान, चामल, गहुँ, लत्ताकपडा, एलईडी टेलिभिजन, गरगहना तथा घरमा रहेका अन्य सामग्री जलेर नष्ट भएका छन्। उनीहरूले पूर्ण रूपमा घर जलेका १० परिवारको करिब ६० लाख रुपैयाँ बराबरको धनमाल क्षति भएको अनुमान गरेका छन्। त्यस्तै, आंशिक क्षति पुगेका ८ घरमा करिब २० लाख रुपैयाँ बराबरको क्षति भएको पीडित पक्षले जानकारी दिएको छ। यसअनुसार कुल क्षति करिब ८० लाख रुपैयाँ पुग्ने अनुमान छ। यद्यपि, क्षतिको यकिन विवरण सम्बन्धित निकायबाट पुष्टि हुन बाँकी छ।
आगलागी भएपछि स्थानीयवासी, इलाका प्रहरी कार्यालय कञ्चनपुरका प्रहरी, सशस्त्र प्रहरी बल दन्तकाली गण बरमझिया तथा कञ्चनरुप र हनुमाननगर कंकालिनी नगरपालिकाका वारुणयन्त्रको सहयोगमा आगो नियन्त्रणमा लिइएको स्थानीयले बताएका छन्।
आगलागीबाट घरबारसँगै दैनिक जीवनयापनका अत्यावश्यक सामग्री गुमाएका परिवार अहिले कठिन अवस्थामा छन्। पीडित परिवारका अनुसार समाचार तयार पार्दासम्म उनीहरूले कुनै पनि निकाय वा संस्थाबाट सहयोग प्राप्त गरेका छैनन्। घर, खाद्यान्न, लत्ताकपडा र अन्य आवश्यक सामग्री गुमाएका परिवारलाई तत्काल राहत तथा पुनःस्थापनाको आवश्यकता रहेको छ।
विपद्का बेला नागरिकको उद्धार, राहत तथा पुनःस्थापनामा सम्बन्धित निकायको भूमिका महत्त्वपूर्ण हुन्छ। यस्तो अवस्थामा स्थानीय सरकार, सम्बन्धित सरकारी निकाय, सामाजिक संघसंस्था तथा सहयोगी मन भएका व्यक्तिहरूले पीडित परिवारको अवस्थाबारे जानकारी लिई आवश्यक सहयोगका लागि पहल गर्ने अपेक्षा गरिएको छ।
घरबारविहीन बनेका परिवारलाई तत्काल राहत र सुरक्षित बसोबासको व्यवस्था गर्न सम्बन्धित निकायले के पहल गर्छन्? विपद्बाट प्रभावित नागरिकलाई समयमै सहयोग पुर्याउन स्थानीय सरकार र सरोकारवाला निकायको ध्यान जान आवश्यक छ।
तपाईको प्रतिक्रिया !!!
